市之將亡必有妖股

繼續遵守止蝕唔止賺法則，把上一浪買入的彩星集團(635)以均價9.14元沽出(沽了兩天)，蝕6%左右，下一個目標是天鴿(1980)了，望就望阿里集團上市時，有機炒一段出貨。

最近反思下半年港股投資組合，以回報率計，比美股及外匯組合差，明明這邊是升市，亦一早捕捉到先機，但就捉到鹿脫唔到角。好彩惠理、中銀香港、資本策略及香港小輪，4隻佔比較重的股份有12%至30%的回報頂一頂，否則今轉整體連一成回報都冇。這轉犯了一個致命錯誤，就係太貪心，每次出手唔夠嚴謹同耐性，值博率唔夠高時，都頻頻出手。

2014年仲有4個月，會有乜野事發生？滬港通消息出時，聯想到對中銀香港同惠理有利，然後到AH差價股，下一轉嘅主題係乜呢？

內地散戶鐿意聽消息炒股，無莊不歡，令人聯想起本地一眾妖股，會趁機搵食。近排見到鄧清河竟然向宏安(1222)提現金全購，諗緊本地妖股係咪好緊野，等新水再Cap一轉勁嘅。如果佢地保持住向下炒，兩億市值的股票賺盡都係一億幾千萬，反而向上炒獲利空間，可以拉到好闊，例如炒到上10億市值再殺落黎，一定比向下炒和味。

相應嘅部署就係，將15%至20%投資組合的錢分為5到10注，押到一堆妖股之上。這方面不是自己專長，所以都參考咗身邊好多人嘅意見。前日小注咗麥紹棠中建富通(138)，止蝕放於0.85元。今日小注以0.51元入咗遠東系嘅遠東國際(36)，原因又係上市公司已把舊有資產盡賣，大股東又放物業入公司，從而增加股權，止蝕放於0.45元。(這隻的靈感係睇Benny Chan早前地主會的Post而來)

炒妖股一定要記住，唔掂要斬，因為股價係會歸「零」的，沒有止蝕的心理準備，就唔好掂了。

(後記: 估唔到下午遠東國際已爆，上個月的經驗，這隻股爆一日就軟，所以唔好亂高追)