長和系大重組之睇法: 真正的撤資？
1）小股東
– 若控股股東折讓收窄，短期股價或有一段所衝
– 誠哥多次話會提高派息，應該仲有嘢睇
– 多隻非A股藍籌如700，941已反彈，消息刺激下，長和系都可能加入大隊
– 負面的是，指數基金或要被逼沽貨
2）誠哥
短期利益：
股市正義堂 Ken Sir 分析，誠哥主要持有長實（1），而以現時換股比率，長實的資產折讓較少，和黃（13）折讓較深，所以對長實較為有利，亦有利誠哥
中期利益：
表面上，長和系分拆成長和（持有非房地產）及長地（房地產）。但以區域劃分，長地非常集中香港，長和集中海外，令我聯想起，當年香港回歸中國，太古（19）有策略咁引入中信泰富（前267）做國泰（293）主要股東，可以平穩過渡，後來更引入國航（753），打通國泰於內地巿場的渠道。因此今次重組，可能係長地引入內資主要股東的前奏，始終房地產係不動產，最後都要同當地政經結合。
長期利益：
過去幾年，長和系每次賣走本港及內地資產，無論係百億物業或幾億的分支業務，都有撤資論，但認真撤走的，對誠哥家族是有限數。反而重組後，要大規模撤資，可輕鬆地沽長地便可，唔洗再一件件拆售咁麻煩，比起遷冊，更實在。當然若他們看好中港房地產，也可增持長地便可。
所以重組後，誠哥於兩間公司的股權變動，就真係會赤裸裸咁，反映佢嘅睇法。自己好主觀咁諗，誠哥將新買的業務都放到長和，很多想賣（如去年打算分拆的酒店）放於長地。李氏家族未來增持長和，減持長地的機會很高。
誠哥真的撤資了？
投資怪傑 