之前講過有興趣買些耀才(1428)，因為間野積極準備滬港通，如果抓到依個機會，生意可能做大幾倍，一直等緊佢公佈集資計劃。
琴晚終於等到公布供股，二供一，供股價1元，大股東葉茂林承諾會供外，還包銷一部份。節目時，自己覺得今日係可以試下執死雞，即係1蚊邊，比多幾仙博下。今朝收到唔少人問，跌到1.3元就跌唔落，間公司好強勢呀，係咪應該係時候追喇？
如果唔計主要股東佔的70.3%，其他股東揸緊3.33億股，而這班股東真的全部都會想供股嗎？假設兩成人唔想供股會沽貨出街，即係6,600萬股，今朝都係得2,000萬股成交，整個供股消息應該未消化完。點解係兩成呢？純粹係直覺，各位可有自己假設。
另一道力來源相信係，同上一次配股有關。今年初耀才配股比周大福個價就係1.3元，這個大位有買盤支持是正常的，但會唔會穿事後先知。
自己嘅策略就係，睇下道購買力吸唔吸得哂那堆沽盤，暫時保持「執死雞」狀態。如果成交股數突破7,000萬股後，股價仲守係1.3元，再睇大環境改變部署。
投資怪傑 