木薯資源(841) 三則短評

11月15日:  見異動

841終於再有異動，如果今次都破唔到頂，就閃人了，都係果句，揸住既睇多陣，冇既唔好亢奮地追。

11月6日: 答讀者Charlie 問題

自從841宣佈配股後，李基培的Orchid Asia不斷減持。睇返CCASS，佢地應該係用中銀國際做買賣。11年時佢地入咗4000萬股，拎中銀國際的持股量升到4400萬左右(假設其他400萬股係其他投資者持有)。宜家中銀國際減到1400百萬左右，即Orchid Asia可能沽多一千萬股出街。

琴日睇報價計，中銀國際淨減持100萬股左右，即Orchid去到今日仲揸約900萬股。估佢地沽埋貨尾，市場就會出現突破(未知係上定落)，到時再諗幾多錢買都未遲。

Orchid Asia: http://www.orchidasia.com/Default.aspx

李基培: http://baike.baidu.com/view/2278879.htm

披露易:　http://www.hkexnews.hk/sdw/search/search_sdw_c.asp

10 月30日:  賭股票之841

這次用「賭股票」，因為真係想試下，近排運氣係咪真係咁好，買乜就升乜。

今次目標係木薯(841)，係泰國出口乾木薯片到中國，check返兩地海關數據，差唔多等於公司的貿易量，所以應該有做實業的。之不過，資訊太發達，中間人的角色愈來愈難做，點解間廠唔直接入口，要比佢地經一手，過一刀，賺一筆呢？

兩年幾前，曾傻到睇好佢地，認為搞好條供應鏈，會有3-5%盈利率執到，好傻咁兩個幾買咗，諗住坐下回報會唔錯。但係後來試過聯絡佢地管理層做訪問，應承之後，一推再推，都知出事，只好蝕十幾個巴仙離場。

最近如果用返，泰國木薯協會的數字去睇，間野今個年度做得幾好，如果冇特別的一次性支出，黎緊業績出盤數，應該幾靚。

不過股價就係近排飆升後配股，仲要係最多折讓19.4%，好可能係就住條例，只要少於20%，就唔洗開股東大會投票而定價。安排到咁，承配人多於六人就預咗喇！去到依個位，任何基本分析可以放埋一邊了… …

重點位係，今次配售行改咗做「長雄證券」，依間野係張志誠創辦的。佢係乜水？如果大家有聽過永義系的官永義係「抽水大王」，佢就絕對係另一位，往績有抽到大凌集團(211)爆咗廠。長雄證券仲幫過人人控股搞財技，2001年時搞十五股合二，之後每兩股供十七股，供股價一仙六，較股價折讓九成。

Ok！去到依個位，相信大家真係入場，都一定會嚴守止蝕，因為家住西貢，辦公室係尖沙咀既木薯老闆，今次唔知又玩乜，生意好返少少，但就泊埋依間行到搞啲咁嘅野。

宜家牌面上，經過年半時間收貨，間野可能已經貨源歸邊，之前乾升幾成，係有得睇冇得食。今次做配售，可能分咗貨比班炒家，陰謀論咁睇，間野可能大炒一轉，所以打算今日入少少貨試下運氣，入貨價必定低於0.78元，一定唔會高追，止蝕位0.67元，目標唔講喇，廢事又比太多幻想大家，打法應該係見步行步，可能每見阻力就走啲貨喇，錢係賺唔盡的，尤其係間野咁鬼祟，入市都係純粹過手癮，絕對唔係投資或投機。

泰國木薯發展學會: http://www.tapiocathai.org/English/M2_e.html

撰文: 棋亮